केंद्रीय मंत्रिमंडळ विस्तारात बीडच्या खासदार प्रितम मुंडे (Pritam Munde) यांना संधी मिळाली नाही म्हणून, भाजप नेत्या पंकजा मुंडे नाराज असल्याची चर्चा गेल्या काही दिवसांपासून सुरूच आहे. त्यातच बीडमध्ये पंकजा मुंडे यांच्या वाढदिवसासाठी लावण्यात आलेल्या होर्डिंगवर भाजपच्या राज्य आणि राष्ट्रीय पातळीवरील नेत्यांचे फोटो नसल्याने विविध चर्चांना उधाण आले होते. पण नाराजीची चर्चा सुरु असतानाच पंकजा मुंडेंना थेट केंद्रीय गृहमंत्री अमित शहा यांचा फोन आला असून, याची माहिती खुद्द पंकजा मुंडे यांनी दिली आहे.
झालं असं की, पंकजा मुंडे यांचा 26 जुलै रोजी वाढदिवस होता. यासाठी अमित शहा यांनी पंकजा मुंडे यांना फोन करुन वाढदिवसाच्या शुभेच्छा दिल्या. पंकजा मुंडे यांनी ट्विट करुन या बाबतची माहिती दिली आहे.
आभार!!दिवसाची सुरुवात अमित भाई च्या फोन ने तर दिवसभर अनेक नेत्यांच्या,केंद्रीय व राज्यातील मंत्री व सहकार्‍यांच्या ,दोन्ही छत्रपतींच्या,राज्यपालांच्या आणि तुमच्या सर्वांच्या मोलाच्या शुभेच्छा, वाढदिवसाच्या निमित्त इतके प्रेम आणि आशीर्वादाने माझी ऊर्जा द्विगुणित झाली..मी ऋणी आहे
— Pankaja Gopinath Munde (@Pankajamunde) July 26, 2021
पंकजा मुंडे नाराज असल्याच्या अनेक चर्चा सद्या सुरु आहेत. मात्र त्यांनी यापूर्वीच दोनदा पत्रकार परिषद घेऊन आपण नाराज नसल्याचे स्पष्ट केले आहे. तसेच मुंबईत समर्थकांची बैठक घेऊन आपण नाराज नसून पूर्ण ताकदीने पक्षाचे काम करण्याचे आवाहन देखील केले होते.