पुण्यात भोंदुबाबाची धक्कादायक करणी, महिलांच्या नग्न शरीरावर चोळायचा लिंबू
घरात गुप्तधन असल्याचं आणि मुलगा होण्यासाठी अघोरी पूजा करावी लागेल असं सांगून भोंदू बाबाने एकाच घरातील पाच महिलांचं लैंगिक शोषण केल्याचा धक्कादायक प्रकार पुण्याच्या पिंपरी चिंचवडमध्ये घडला आहे. सोबतच भोंदुबाबाने कुटंबाला ३ लाखाचा गंडाही घातला. याविरोधात पिंपरी पोलीस ठाण्यात गुन्हा दाखल झाला असून आरोपीला पोलिसांनी अटक केली आहे. आरोपीचं नाव सोमनाथ चव्हाण आहे. या घटनेमुळे संपूर्ण परिसरात एकच खळबळ उडाली आहे.
भोंदुबाबाने कुटुंबाला तुमच्या घराच्या एका खोलीमध्ये गुप्तधन आहे. त्यात 7 पेट्या धन, एक सोन्याची घागर आणि एक गणपतीची मुर्ती असा खजिना असल्याचं सांगितलं. तसेच तुमच्या घरातील मनाली नावाच्या मुलीच्या जीवाला धोका आहे. तुमच्या घरामध्ये पुत्रप्रात्पी होऊ नये यासाठी तुमच्याच एका नात्यातील बाईने करणी केली आहे. तुम्हाला पुत्र हवा असेल, मनालीचा जीव वाचवायचा असेल आणि खजिना हवा असेल तर घरात उतारा टाकावा लागेल आणि नग्न पूजा करावी लागेल. अशी कारण आणि आमिष दाखवून भोंदूबाबाने पीडित कुटुंबियांना आपल्या जाळ्यात ओढलं.
या विधीसाठी 3 लाखाचा खर्च आणि माझी 11 हजार रुपये दक्षिणा द्यावी लागले. पुढच्या 15 दिवसांत उतारा टाकला नाही तर घरातील सदस्यांच्या जीवाला धोका असल्याचं सांगत आरोपी सोमनाथ चव्हाणने कुटुंबाला घाबरवलं. अशाप्रकारे भीती घातल्यामुळे कुटुंबीय अघोरी विद्या करण्यासाठी तयार झाले.
पुजेसाठी पैशांची व्यवस्था करण्यासाठी कुटुंबाने घरातील सोनं विकून आरोपी सोमनाथला पैसे दिले. त्यानंतर 20 दिवसांनी घरी येऊन सोमनाथने एक काळी कोंबडी, बाहुल्या, टाचण्या, पांढरे कापड, मीठ, लिंबू, कोहळा आणि खूप सामान घेऊन आला. त्यानंतर त्याने प्रत्येकावर उतारा टाकण्यास सुरुवात केली. सगळ्यांच्या अंगावरील कपडे त्याने काढून स्वत:कडे ठेवले.
पुजेच्या नावाखाली घरातील महिला आणि अल्पवयीन मुलींच्या अंगावर लिंबू पिळुन अंगावर चोळण्याचा लज्जास्पद प्रकार या नराधमाने केला आहे. हा सगळा प्रकार करताना तो कोणाशीतरी बोलण्याचे नाटक करायचा आणि त्या लहान आहेत त्यांना मारू नको असं म्हणत कुटुंबियांना घाबरवायचा. अशी सर्व माहिती पोलिस तपासातून समोर आली आहे.