तिची चित्रं का झळकतायेत पंतप्रधान कार्यालयात

पंतप्रधान कार्यालयात चित्रकार प्रणिता प्रविण बोरा हिचे ‘उलुखबन्धनम्’ या ‘कॉन्टॅप्ररी आर्ट’ या शैलीतील चित्र लावण्यात आले आहे. नाकी-डोळी नसलेल्या या चित्रातून व्यक्त होणारे भाव याची खासियत असून सगळ्यांच्या मनावर वेगळीच छाप उमटवणारे चित्र आहे. या चित्रात नटखट श्रीकृष्णाचे वर्णन करण्यात आले आहे. दरम्यान प्रणिता बोराने, आपल्या चित्रांची निवड पंतप्रधान कार्यालयासाठी होणं हा माझासाठी मोठा बहुमान आहे. हा क्षण माझ्यासाठी खूप आनंदाचा असून माझावरील जबाबदारी आणखी वाढली आहे. असं म्हटलंय.

केंद्र सरकारच्या ललित कला अकादमीची राष्ट्रीय शिष्यवृत्ती प्रणिताला ऑगस्ट २०१८ मध्ये मिळाली होती. त्यावेळी तिने चित्रांचे पुस्तक तयार करुन अकादमीकडे दिले होते. अकादमीनेच स्वत:हून तिची चित्र पंतप्रधान कार्यालयाकडे पाठवली होती. त्यानंतर पंतप्रधान कार्यालयातील निवड समितीने प्रणिताच्या चित्राची निवड केली आहे.

कोण आहे चित्रकार प्रणिता बोरा?

प्रणिताने जीडी फाईन आर्टमध्ये पदवी मिळवली आहे. बाँबे आर्ट सोसायटीने तिच्या चित्रांचे प्रथम २०१५ मध्ये प्रदर्शन भरवले होते. मागील वर्षी मुंबईच्या जहांगीर आर्ट गॅलरीत तिच्या चित्रांचे प्रदर्शन आयोजित केले गेले होते. जे. जे. स्कूल ऑफ आर्ट, मॉडर्न आर्ट गॅलरी यांनी आयोजित केलेल्या राष्ट्रीय स्पर्धातून तिने पारितोषिके मिळवली आहेत. लवकरच तिचे दिल्लीत चित्र प्रदर्शन भरवले जाणार आहे. परदेशातही प्रदर्शन आयोजित करण्याचा तिचा मानस आहे. प्रणिता शास्त्रीय संगीताचीही विद्यार्थिनी आहे. आनंदवनच्या श्रमसस्कार शिबिरात ती सहभागी होत असते. वडील, शहरातील व्यावसायिक प्रविण बोरा यांच्याबरोबरीने प्रणिता नगरच्या स्नेहालय संस्थेच्या कार्यात सहभागी होत असते.