मेडिकल कॉलेजमध्ये रॅगिंग पुन्हा डोकं वर काढतंय

तिघा वरिष्ठ स्त्रीरोगतज्ज्ञ महिला डॉक्टर्सनी केलेल्या रॅगिंगला कंटाळून जळगाव जिल्ह्यातील डॉ. पायल सलमान तडवी या तेवीस वर्षीय महिला डॉक्टरने गळफास लावून आत्महत्या केल्याची धक्कादायक घटना मुंबईतील नायर रुग्णालयात घडली आहे. आज सकाळी (शुक्रवार) पायलचा मृतदेह जळगावी आणल्यानंतर या प्रकरणातील दोषींना तात्काळ अटक करण्यात यावी, या मागणीसाठी तिच्या नातेवाईकांनी मृतदेह थेट जिल्हाधिकारी कार्यालयात आणला होता.

पायल तडवी हिने सांगलीच्या मिरज येथील वैद्यकीय महाविद्यालयातून एमबीबीएसचे शिक्षण घेतले होते. त्यानंतर पदव्युत्तर शिक्षण घेण्यासाठी तिने मे 2018 मध्ये मुंबईतील नायर रुग्णालयात प्रवेश घेतला होता. ती स्त्रीरोगतज्ज्ञ पदव्युत्तर पदवीच्या दुसऱ्या वर्षात शिकत होती. मात्र, पहिल्या वर्षापासून तिच्या वरिष्ठ सहकारी असलेल्या महिला डॉक्टर हेमा आहुजा, भक्ती अहिरे तसेच अंकिता खंडेलवाल या तिन्ही पायल हिचा वेगवेगळ्या प्रकारे छळ करीत होती. रुग्णांसमोर अपमानित करणे, मोठ्या आवाजात रागावणे, जातीवाचक बोलून सतत हिनवणे, जेवू न देणे, जास्तीची कामे लावणे असे प्रकार पायल सोबत त्या करत होत्या. मात्र, या प्रकारसंदर्भात तक्रार केली तर आपल्या शिक्षणात अडचणी निर्माण होतील, या भीतीने पायल गप्प राहिली. सहकाऱ्यांकडून होणारा छळ असह्य झाल्याने पायलने आपल्या पतीसह आईला कल्पना दिली होती.

आईला देखील आला रॅगिंगचा अनुभव-

पायलची आई आबेदा तडवी या कर्करोग रुग्ण आहेत. ऑक्टोबर 2018 ते डिसेंबर 2018 दरम्यान त्या उपचार घेण्यासाठी नायर रुग्णालयातील रेडिएशन विभागात अनेकदा गेल्या. परंतु, पायल त्यांना वरिष्ठांकडून होणाऱ्या अडवणुकीमुळे एकदाही भेटू शकली नाही. आपल्या मुलीचा छळ होत असल्याचे पाहून आबेदा तडवींनी रुग्णालयाच्या अधिष्ठातांकडे १० मे रोजी या प्रकाराबाबत लेखी तक्रार केली होती. त्यात डॉ. हेमा आहुजा, डॉ. भक्ती अहिरे तसेच डॉ. अंकिता खंडेलवाल या तिन्ही वरिष्ठ डॉक्टर पायल हिचा वेगवेगळ्या प्रकारे छळ करीत असल्याचे म्हटले होते. पण रुग्णालय प्रशासनाने त्यांच्या तक्रारीची दखल घेतली नाही. शेवटी त्रास असह्य झाल्याने पायलने आत्महत्या केली, असा आरोप पायलच्या आईने केला आहे. रुग्णालय प्रशासनाने वेळीच पायलच्या आईच्या तक्रारीची दखल घेतली असती तर कदाचित ही घटना टळली असती, असे नातेवाईकांनी सांगितले.

आग्रीपाडा पोलीस ठाण्यात तक्रार-

दरम्यान पायलच्या आईने दिलेल्या फिर्यादीवरून मुंबईतील आग्रीपाडा पोलीस ठाण्यात तीन सहकारी महिला डॉक्टरवर रॅगिंग तसेच आत्महत्तेस प्रवृत्त केल्याचा गुन्हा दाखल करण्यात आला आहे. मात्र, तिघींना अद्याप अटक झालेली नाही. आम्हाला न्याय मिळाला नाही तर मंत्रालयासमोर उपोषण करेल, असा इशारा पायलच्या आईने दिला आहे. पायलचा मृतदेह आज जळगावी आणल्यानंतर या प्रकरणातील दोषी डॉ. हेमा आहुजा, डॉ. भक्ती अहिरे तसेच डॉ. अंकिता खंडेलवाल यांना तात्काळ अटक करण्यात यावी, या मागणीसाठी तिच्या नातेवाईकांनी मृतदेह थेट जिल्हाधिकारी कार्यालयात आणला होता. मात्र, पोलिसांनी योग्य ती कारवाई करण्याचे आश्वासन दिल्याने पायलच्या नातेवाईकांनी संतप्त पवित्रा मागे घेतला. त्यानंतर पायलवर शोकाकुल वातावरणात अंत्यसंस्कार करण्यात आले.

https://youtu.be/oSMGfumpsQM