प्रत्येक कुटुंबाने आवर्जून पहावी अशी ही ‘परफेक्ट फॅमिली’!

"आपण एकाच छताखाली ३० वर्ष राहिलो, पण एकाच घरात कधी राहिलोच नाही..."

हे वाक्य आहे 'Perfect Family' या वेब सिरीजमधील आईचं (सीमा पाहवा). हे एकच वाक्य आजच्या अनेक भारतीय कुटुंबांचे विदारक सत्य मांडण्यासाठी पुरेसे आहे. आपण घराला रंगरंगोटी करतो, महागड्या वस्तू घेतो, पण त्या घरात राहणाऱ्या माणसांच्या मनातील जळमटं कधीच साफ करत नाही. पंकज त्रिपाठी यांची पहिली निर्मिती असलेली आणि JAR Pictures च्या बॅनरखाली प्रदर्शित झालेली ही सिरीज प्रत्येक कुटुंबासाठी एक 'वेक-अप कॉल' आहे.

गोष्ट एका 'परफेक्ट' भासणाऱ्या कुटुंबाची

दिल्लीत राहणाऱ्या 'करकरिया' कुटुंबाची ही गोष्ट. वरवर पाहता हे एकत्र कुटुंब अत्यंत सुखी वाटते. घरात हसण-खिदळण आहे, सण-उत्सव आहेत. पण जेव्हा घरातील सर्वात लहान सदस्य दानीला शाळेत अचानक 'अँझायटी अटॅक' येतो तेव्हा या सुखाचा मुखवटा गळून पडतो. दानीला या त्रासातून बाहेर काढण्यासाठी आणि कुटुंबाची प्रतिष्ठा राखण्यासाठी संपूर्ण कुटुंब 'फॅमिली थेरपी'च्या खुर्चीत येऊन बसतं. आणि तिथूनच सुरू होतो एक असा प्रवास, जो आपल्याला आपल्याच कुटुंबातील त्रुटींची जाणीव करून देतो.

मुलांचे मानसिक आरोग्य: पालकांच्या वागण्याचा आरसा

मुले तेच वागतात जे ती घरात पाहतात हाच या सिरीजचा सर्वात मोठा संदेश आहे. आपण अनेकदा मुलांसमोर वाद घालतो, एकमेकांना टोमणे मारतो किंवा अबोला धरतो. आपल्याला वाटतं की मुलं खेळण्यात दंग आहेत, त्यांना काय समजणार? पण 'Perfect Family' दाखवते की, मुलं प्रत्येक नकारात्मक भावना स्पंजसारखी शोषून घेतात. दानीचा आजार हा शारीरिक नसून तो तिच्या घरातल्या अशांत वातावरणाचा परिणाम आहे. जर तुम्हाला तुमचं मूल मानसिकदृष्ट्या सुदृढ हवं असेल, तर आधी तुम्हाला तुमच्या घराचं मानसिक आरोग्य सुधारावं लागेल, हे ही सिरीज पालकांना खडसावून सांगते.

मध्यमवर्गीय घरांचे 'न बोललेले' प्रश्न

आपल्याकडे मध्यमवर्गीय घरांमध्ये एक अलिखित नियम असतो—"काहीही झालं तरी घराबाहेर कळता कामा नये." यामुळे आपण भावना दाबून ठेवतो. या सिरीजमध्ये मनोज पाहवा यांचे पात्र 'इगो' (अहंकार) आणि 'परंपरा' यांच्यात अडकलेले दिसते, तर सीमा पाहवा या 'त्याग' करणाऱ्या आईच्या भूमिकेत दिसतात. पण या त्यागामुळे आपण जेव्हा गुदमरायला लागतो, तेव्हा काय होतं? हे यात खूप सुंदररीत्या मांडलं आहे. घरातील पुरुषांनी त्यांच्या भावना व्यक्त करणे आणि स्त्रियांनी त्यांच्या हक्कांसाठी बोलणे हे का गरजेचे आहे, याचे चित्रण यात दिसते.

'जनरेशन गॅप' आणि संवादहीनता

"एकत्र बांधलेल कुटुंब म्हणजेच सर्वकाही" असं म्हणणारी जुनी पिढी आणि "आम्हाला स्पेस हवी आहे," असं म्हणणारी नवीन पिढी; यातील दरी ही सिरीज अतिशय वास्तववादी पद्धतीने मांडते. संवाद म्हणजे केवळ एकमेकांशी बोलणे नव्हे, तर एकमेकांना 'ऐकून' घेणे होय. आपण ऐकतो ते फक्त उत्तर देण्यासाठी, समजून घेण्यासाठी नाही हे कटू सत्य या सिरीजच्या प्रत्येक भागात जाणवतं.

थेरपी म्हणजे वेडेपण नव्हे!

भारतीय समाजात मानसोपचारतज्ज्ञाकडे जाणे आजही 'कलंक' मानलं जातं. ही सिरीज हा गैरसमज मोडीत काढते. थेरपी ही केवळ वेडेपणावर औषधोपचारासाठी नसते, तर ती मनामधील गुंते सोडवण्याची एक पद्धत आहे. जेव्हा करकरिया कुटुंबातील सदस्य थेरपिस्टसमोर आपली गुपितं आणि एकमेकांबद्दलचा राग मोकळेपणाने व्यक्त करतात, तेव्हाच त्यांना खऱ्या अर्थाने हलकं वाटू लागतं. ही मालिका सांगते की, "मदत मागण्यात काहीच गैर नाही."

'परफेक्ट' असण्याच्या दडपणातून मुक्ती

सोशल मीडियाच्या युगात आपण 'परफेक्ट' पालक किंवा 'परफेक्ट' मूल बनण्याच्या शर्यतीत आहोत. ही सिरीज आपल्याला सांगते की, 'Perfect' असण्यापेक्षा 'Real' असणं जास्त महत्त्वाचं आहे. जर तुम्ही तुमचं दुःख मुलांसमोर मान्य केलं आणि त्यांना सांगितलं की "आज बाबांना किंवा आईलाही थोडं लो वाटतंय," तर मुलांनाही भावनांचे महत्त्व समजते. यामुळे घरात विश्वासाचं वातावरण तयार होतं.

अभिनय आणि दिग्दर्शन

मनोज पाहवा आणि सीमा पाहवा यांच्या अभिनयाबद्दल जितकं बोलावं तितकं कमीच आहे. त्यांच्यातील छोटे-छोटे वाद आणि प्रेम अत्यंत नैसर्गिक वाटतं. गुलशन देवय्या, नेहा धुपिया आणि गिरिजा ओक यांनी आजच्या 'सँडविच जनरेशन'ची ओढाताण अतिशय प्रभावीपणे पडद्यावर मांडली आहे. दिग्दर्शक सचिन पाठक यांनी कुठेही ओढून-ताणून ड्रामा न करता, साध्या संवादातून खोलवरच्या जखमांवर फुंकर घातली आहे.

ही सिरीज का पाहावी?

'Perfect Family' ही केवळ एक वेब सिरीज नाही, तर ती एक उपचार पद्धती आहे. ही सिरीज पाहताना तुम्हाला कधी हसू येईल, तर कधी स्वतःच्या वागण्याची लाज वाटेल. पण शेवटी ही सिरिज तुम्हाला तुमच्या कुटुंबाच्या जवळ नक्की घेऊन जाईल.

जर तुम्हाला तुमचं कुटुंब खऱ्या अर्थाने 'परफेक्ट' करायचं असेल, तर जगाला दाखवण्यासाठी नाही, तर एकमेकांसाठी जगायला शिका. एकमेकांना समजून घ्या, प्रेमाने वागा. "तुम्हालाही कधी असं वाटलंय का की आपल्या घरातल्या काही गोष्टींवर आपण मोकळेपणाने बोललं पाहिजे? तर ही सिरीज संपूर्ण कुटुंबासोबत एकत्र बसून एकदा नक्कीच पहा.